28.1 C
Manila
Huwebes, Mayo 30, 2024

DICT Tech4ED center, inilunsad sa Mindoro State University

- Advertisement -
- Advertisement -

BINUKSAN ng Department of Information and Communications Technology (DICT) Mimaropa sa pangunguna ni Regional Director Cheryl Ortega, kasama ang mga opisyales ng DICT Oriental Mindoro ang Technology Empowerment for Education, Entrepreneurship, Employment, and Economic Development (Tech4ED) sa Mindoro State University, Calapan City Campus noong Marso 6, 2024.

Binisita ni DICT Regional Director Cheryl Ortega (pangalawa sa kaliwa) ang bagong Tech4ED Center sa Mindoro State University Calapan Campus matapos ang isinagawang paglulunsad ng nasabing center kamakailan. (Larawan kuha ni Dennis Nebrejo/PIA Mimaropa-Oriental Mindoro)

Kasabay ng paglulunsad ay ang paglagda ng Memorandum of Understanding (MoU) sa pagitan ng DICT na kinatawanan ni Ortega, DICT Oriental Mindoro provincial officer Engr. Norly Tabo at ni Mindoro State University officer-in-charge, university president Dr. Christian Anthony Agutaya at mga opisyales ng paaralan para mapabilang sa hanay ng Tech4ED center na siyang mapapakinabangan ng mga mag-aaral ng nasabing unibersidad.

Ayon kay Ortega, ang center ay mayroong iba’t ibang model na naka base sa mga public libraries, pamahalaang bayan ng lungsod at sa barangay na patuloy na dumarami ang bilang upang mapabilis ang pagsulong ng bansa tungo sa ‘digital and education divide’.

“Bilang katuwang ng Mindoro State University ang DICT, layunin ng paglalagay ng center ay makapagbigay ng karagdagang materyales sa pag-aaral ng mga estudyante pati sa mga guro upang makapasok sa Cisco Academy ng libreng kurso sa basic at intermediate na kung saan ay narito ang mga tinatawag na emerging contents na siyang mapapakinabangan ng mga mag-aaral,” dagdag ni Ortega.

Samantala, matapos ang aktibidad sa nasabing unibersidad ay agad na tumulak ang grupo ni Ortega sa Mindoro State University – Bongabong Campus upang ilunsad din ang Tech4ED center na siya namang magpapalakas sa mga kalapit na komunidad sa mga programa, kurso, at iba’t ibang kaganapan na may kaugnayan sa pagsasanay sa larangan ng informations and communications technology.

Ito rin ang maghahatid sa dalawang institusyon upang mauna sa mga makabagong teknolohiya sa pamamagitan ng pagpupursige at kolaborasyon ng dalawang paaralan para mapagtagumpayan ang misyon nito na konektahin ang mga lugar na hindi naaabot ng makabagong teknolohiya. (DN/PIA MIMAROPA – Oriental Mindoro)

- Advertisement -

- Advertisement -
- Advertisement -