28.1 C
Manila
Huwebes, Mayo 30, 2024

Gatchalian hinikayat ang taxpayers na maghain ng ITR bago ang deadline na Abril 15

- Advertisement -
- Advertisement -

HINIKAYAT ni Senador Win Gatchalian ang mga taxpayer na maghain ng kanilang income tax returns habang papalapit ang Abril 15 na deadline para sa paghahain.

Tiniyak ni Gatchalian, pangunahing may-akda ng Ease of Paying Taxes Act (EOPT), sa mga taxpayer na ang pagtupad sa kanilang obligasyon ay magiging mas madali sa mga darating na panahon.

Nito lang Abril a-uno ay naglabas ang Bureau of Internal Revenue (BIR) ng Bank Bulletin No. 2024-02 na nag-uutos sa lahat ng BIR authorized agent banks na tanggapin ang lahat ng naka-print na kopya ng electronically filed tax returns o payment forms sa pamamagitan ng eBIRForms at ang kaukulang buwis na dapat bayaran.

“Ngayong naisabatas na ang panukalang EOPT, kumpiyansa ako na magiging mas madali ang proseso ng paghahain ng income tax returns para sa ating mga taxpayers,” sabi ni Gatchalian, na nagsisilbing chairman ng Senate Committee on Ways and Means.

Ipinaliwanag niya na sa ilalim ng batas, pinahihintulutan ang paghahain ng returns at pagbabayad ng buwis sa pamamagitan ng electronic na pamamaraan o mano-mano sa alinmang awtorisadong bangko ng ahente, o revenue district office sa pamamagitan ng isang revenue collection officer o awtorisadong tax software provider.

Kasunod ng layuning gawing moderno ang pangangasiwa ng buwis, ang panukalang EOPT ay inaasahang magpapahusay sa pagkolekta ng buwis at maghihikayat sa publiko na sumunod sa mandatong magbayad ng buwis. Ito ay titiyak sa pagkakaroon ng pondo para sa mga kinakailangang imprastraktura at mga programang makakatulong para maibsan ang kahirapan, sabi ni Gatchalian.

Target ng BIR na makakolekta ng P3.05 trilyon ngayong 2024 kumpara sa kabuuang koleksyon na P2.53 trilyon noong 2023.

“Umaasa tayo na ang tax compliance at tax collection ay tiyak na maaayos kapag tuloy-tuloy nang maipatupad ang mga probisyon ng EOPT,” sabi ni Gatchalian.

“Importante na maging mas madali para sa ating mga taxpayers ang pagbabayad ng buwis at kailangan ding sumunod ang mga taxpayers sa pagtupad sa kanilang obligasyon sa gobyerno,” dagdag niya.

- Advertisement -

- Advertisement -
- Advertisement -