28.1 C
Manila
Linggo, Hulyo 21, 2024

Pangandaman, binigyang papuri ang desisyon ni PBBM na palawigin ang termino ng mga COS at JO sa gobyerno

- Advertisement -
- Advertisement -
PINURI ni Department of Budget and Management (DBM) Secretary Mina F. Pangandaman ang desisyon ni Pangulong Ferdinand R. Marcos Jr. na palawigin ang kontrata ng mga kawani ng gobyerno na nasa ilalim ng Contract of Service (COS) at Job Order (JO) para sa isa pang taon.
Ang desisyon ng Pangulo ay ginawa sa isang sectoral meeting na idinaos sa Malacañan Palace noong ika-24 ng Abril 2024, kasama ang mga opisyal mula sa DBM, Department of the Interior and Local Government (DILG), Civil Service Commission (CSC), at Commission on Audit (COA). Sa pulong, tinalakay ang kasalukuyang mga patakaran at regulasyon tungkol sa mga manggagawa na COS at JO, na nakasaad sa Commission on Audit (COA)-DBM Circular No. 2, s. 2020, at iba pang mga paksa.
“I am delighted to hear about the decision of our beloved President to extend the engagement of COS and JO workers whose contracts are set to expire by end of this year. Malaking kapanatagan po ito sa ating mga empleyado na ma-extend pa ng isang taon ang kanilang mga kontrata sa trabaho. Alam naman po natin na malaking ginhawa ang naibibigay sa isang pamilya kung ang isang kaanak ay may trabaho,” pahayag ni Secretary Pangandaman.
“On our part po sa DBM, what we can assure po is that we will adhere to the directive of the President to help in the conduct of a thorough study of the current state of our government workforce,” dagdag pa niya.
Sinabi ni Undersecretary Wilford Will Wong, ang kinatawan ng DBM sa sectoral meeting, na noong Hunyo 30, 2023, mayroong mga halos 832,812 COS/JO workers na nasa ilalim ng iba’t ibang ahensya ng gobyerno sa buong bansa. Ito ay nagpapakita ng 22.90% pagtaas mula sa bilang noong nakaraang taon na 642,077 COS/JO workers.
Inatasan din ni Pangulong Bongbong Marcos ang mga ahensya ng gobyerno na ipatupad ang mga estratehiya upang matulungan ang mga manggagawang kwalipikado para sa mga permanenteng posisyon. Isa sa mga estratehiyang kinukunsidera ay ang pagpapaunlad ng kakayahan at kaalaman ng mga manggagawang COS at JO sa pamamagitan ng pag-aaral at pagsasanay, at pagbibigay sa kanila ng pagkakataon na pumasa sa civil service examination.
Ang COS ay tumutukoy sa pagkakaugnay ng isang indibidwal, pribadong kumpanya, iba’t ibang ahensya ng gobyerno, non-governmental agency, o international organization bilang konsultant, tagapagbigay ng learning services, o technical expert para sa isang espesyal na proyekto o trabaho sa loob ng tiyak na panahon.
Samantala, ang JO ay tumutukoy sa mga piece work (pakyaw) o pansamantalang trabaho na ginagawa sa maikling panahon at para sa partikular na bahagi ng gawain.
- Advertisement -

- Advertisement -
- Advertisement -