SA isang makasaysayang unang pagkakataon, nakipagpulong ang Kalihim ng Department of Budget and Management (DBM) kasama ang Teachers’ Dignity Coalition (TDC), na kinatawan ng mga pangulo ng mga lokal na chapter at pinangunahan ni TDC Chairman Benjo Basas, nagsasagawa ng mahahalagang hakbang upang tugunan ang mga hinaing sa pagtaas ng sahod ng mga guro at mga insentibo.
Sa pagpupulong na pinangunahan ni DBM Secretary Amenah “Mina” Pangandaman, tinalakay ang kalagayan ng Performance-Based Bonus (PBB) para sa FY 2022, ang epekto ng Executive Order No. 61 sa PBB at Productivity Enhancement Incentive (PEI), ang mga resulta ng mga pag-aaral ng DBM-GCG (Governance Commission for Government-Owned or Controlled Corporations), at ang mga development sa iminungkahing pagtaas ng suweldo para sa FY 2024.
Upang pawiin ang pangamba ng mga guro sa bansa, tiniyak ng DBM na sa kabila ng pag-isyu sa Executive Order No. 61, na nag-uutos ng review ng Result-Based Performance Management System (RBPMS) at Performance-Based Incentive System (PBIS), ang pagpapalabas ng PBB para sa FYs 2022 at 2023 ay magpapatuloy pa rin.
Ipinabatid ni Director Gerald Janda ng DBM Organization, Position and Classification and Compensation Bureau (OPCCB) na nagsasagawa sila ng masusing koordinasyon sa Department of Education (DepEd) para sa kanilang FY 2022 PBB upang mapabilis ang proseso, tulad ng pag-validate ng isinumiteng Form 1.0 para sa pagsasama ng mga kawani na hindi naiulat sa Department’s Personnel Services Itemization and Plantilla of Personnel (PSIPOP), maling impormasyon, at mga duplicate records, bukod sa iba pa.
Sa kasalukuyan, ang mga Form 1.0 na isinumite mula sa walong (8) Regional Offices ng DepEd, kabilang ang NCR, Ilocos, Cagayan, Central Luzon, Calabarzon, Mimaropa, Bicol, at Western Visayas, ay ibinalik para sa pag-rebisa at pag-validate ng DepEd.
“We must understand that the sheer size and complex structure of DepEd inherently complicates the process,” paliwanag ni Secretary Mina.
Makikipagtulungan ang DBM sa DepEd upang malutas ang mga isyu kaugnay sa pagpapatupad ng PBB at matiyak na ang lahat ng kinakailangang requirements ay natutugunan para sa pamamahagi ng bonus.
“Napaka-tedious ng requirements ngayon. Napakadaming dokumento. Timely po na ma-review natin ang components and submissions naten sa PBB. We will endeavor to streamline this process,” dagdag ni Sec. Mina.
Sa ilalim ng Executive Order No. 61, sinusuri ng DBM ang RBPMS at PBIS upang gawing mas magaan at mas epektibo ang proseso. Ang mga pagbabago ay dapat naaayon sa ease of doing business initiatives, sa Philippine Development Plan 2023-2028, sa Socioeconomic Agenda ni PBBM’s, at sa international standards.
Samantala, inihayag ni TDC Chair Benjo Basas na balak ng koalisyon na isumite ang isang proposal upang buhayin ang dating simplified performance appraisal system para sa mga guro.
Sa kabilang banda, ang alokasyon ng budget para sa FY 2024 Productivity Enhancement Incentive (PEI) ay ganap nang inilabas sa DepEd noong Enero ng taong ito.
Tungkol naman sa inaasahang pagtaas ng sahod para sa civilian government employees, kasama na ang mga guro sa pampublikong paaralan, kinumpirma ng DBM na mayroon nang pondo para sa salary adjustment na nakalaan sa FY 2024 General Appropriations Act.
Kasalukuyang isinasagawa ang isang bagong pag-aaral tungkol sa compensation and benefits upang gabayan ang mga pagsasaayos ng suweldo sa hinaharap. Layunin ng pag-aaral na lumikha ng isang competitive, matatag, at patas na pay structure para sa mga government employees.
Ipiprisenta sa Pangulo ang mga opsyon para sa layuning ito. Patuloy pang isinasaayos ang mga partikular na detalye tungkol sa petsa ng pagpapatupad at irerekomendang rates.
“Thank you po dahil it’s the first time we had a dialogue with the DBM Secretary. Una po kasi, Usec and Asecs po ang humaharap sa ‘min. We appreciate the gesture,” ipinahayag ni TDC Chair Benjo Basas.
“Nakapagsalita ‘yung mga tao. [the meeting was] democratic, and nabigyan po talaga kami ng space ni Secretary mismo na, makapagsalita at makapagpahayag ng aming hinaing. With the aid of the Usecs and Asecs, right away meron mga sagot sa aming queries,” sinabi ni TDC Chair Basas, habang pinupuri ang maaagap na pagtugon ni Secretary Pangandaman.
Tiniyak ni Sec. Pangandaman sa TDC ang kahandaan ng DBM na tugunan ang kanilang mga pangangailangan. “I hope we can do this [meeting] regularly para magkaron po tayo ng updates at solusyon sa mga issues. The DBM is open [to discussing] lahat po ng inyong pangangailangan. We will endeavor to solve whatever problem to the best of our abilities.”
