IDINAOS ng Pamahalaang Lungsod ng Mandaluyong ang ikalawang B.A.A. College Fair sa event center ng SM Megamall para mabigyan ng magandang oportunidad ang mga estudyante na makapili ng gusto nilang kurso sa kolehiyo.
Ang “Be Academically Aware: A Scholastic Guide to Shape Our Future” ay proyektong isinulong nina Mandaluyong City Mayor Ben Abalos, Vice Mayor Menchie Abalos, at ni Councilor Benjie Abalos at bukas sa mga estudyanteng Grade 12 kahit na hindi nag-aaral sa Mandaluyong.
Sinimulan ang proyektong “Be Academically Aware” College Fair noong Disyembre ng nakaraang taon. Layunin nito na pagsamahin sa iisang lugar ang mga kolehiyo at unibersidad para ialok ang kanilang mga kurso sa mga estudyanteng Grade 12 para sa kanilang pagpasok sa kolehiyo sa susunod na taon.
Mayroong mahigit 30 eskwelahan na matatagpuan sa Metro Manila ang lumahok sa idinaos na college fair noong nakaraang taon. Para naman sa taong ito ay may lumahok na 40 eskwelahan kabilang ang Polytechnic University of the Philippines (PUP), University of Santo Tomas (UST), University of the Philippines-Manila, San Beda College, De La Salle University, Colegio de San Juan de Letran, Mapua University, at ang bagong bukas na Mandaluyong College of Science and Technology (MCST).
Ayon kay Councilor Benjie Abalos, na siyang nakaisip ng nasabing programa, ay noong magtatapos pa lamang siya ng high school ay ginawa niya rin na bumisita sa iba’t ibang eskwelahan para makapag-apply sa kursong kaniyang kinuha sa kolehiyo. Kaya’t kaniyang iminungkahi kay Mayor Ben na magkaroon ng isang college fair ang pamahalaang lungsod para mabawasan ang gastos sa pamasahe at ang masasayang na oras sa biyahe ng mga kabataan.
Inaprubahan agad ni Mayor Abalos ang panukalang college fair dahil, para sa kanya, may mas magandang kinabukasan ang taong nakapagtapos ng kolehiyo.
